ਖੇਤੀਬਾੜੀ ਤੋਂ ਪ੍ਰੋਸੈਸਿੰਗ ਅਤੇ ਹੁਨਰ ਵਿਕਾਸ ਤੱਕ: ਵਿਧਾਇਕ ਸੰਦੀਪ ਜਾਖੜ ਜੀ ਨੇ ਆਈਸੀਏਆਰ-ਸਿਫੈੱਟ ਅਤੇ ਕੇਵੀਕੇ ਫਾਜ਼ਿਲਕਾ ਦੀਆਂ ਗਤੀਵਿਧੀਆਂ ਦਾ ਲਿਆ ਜਾਇਜ਼ਾ

 ਅਬੋਹਰ ਦੇ ਵਿਧਾਇਕ ਸ੍ਰੀ ਸੰਦੀਪ ਜਾਖੜ ਜੀ ਨੇ ਅੱਜ ਆਈਸੀਏਆਰ-ਸਿਫੈੱਟ, ਖੇਤਰੀ ਸਟੇਸ਼ਨ, ਅਬੋਹਰ ਅਤੇ ਕੇਵੀਕੇ ਫਾਜ਼ਿਲਕਾ ਦਾ ਦੌਰਾ ਕਰਕੇ ਸੰਸਥਾ ਦੀਆਂ ਵੱਖ-ਵੱਖ ਗਤੀਵਿਧੀਆਂ ਅਤੇ ਕਿਸਾਨ ਹਿੱਤੂ ਪਹਿਲਕਦਮੀਆਂ ਦਾ ਜਾਇਜ਼ਾ ਲਿਆ।ਇਸ ਦੌਰਾਨ ਉਨ੍ਹਾਂ ਨੇ ਸੰਸਥਾ ਦੇ ਵੱਖ-ਵੱਖ ਹਿੱਸਿਆਂ, ਪ੍ਰਯੋਗਸ਼ਾਲਾਵਾਂ, ਖੇਤੀ ਪ੍ਰੋਸੈਸਿੰਗ ਕੇਂਦਰ, ਮਖਾਨਾ ਫੀਲਡ ਅਤੇ ਫਾਜ਼ਿਲਕਾ ਜ਼ਿਲ੍ਹੇ ਲਈ ਸ਼ੁਰੂ ਕੀਤੀਆਂ ਜਾ ਰਹੀਆਂ ਨਵੀਆਂ ਪਹਿਲਕਦਮੀਆਂ ਦਾ ਨਿਰੀਖਣ ਕੀਤਾ।ਵਿਧਾਇਕ ਜੀ ਨੇ ਮਿੱਟੀ ਵਿਗਿਆਨ ਅਤੇ ਗ੍ਰਹਿ ਵਿਗਿਆਨ ਪ੍ਰਯੋਗਸ਼ਾਲਾਵਾਂ ਦਾ ਵੀ ਦੌਰਾ ਕੀਤਾ ਅਤੇ ਕਿਸਾਨਾਂ, ਪੇਂਡੂ ਨੌਜਵਾਨਾਂ ਅਤੇ ਔਰਤਾਂ ਲਈ ਕੇਵੀਕੇ ਵੱਲੋਂ ਕੀਤੇ ਜਾ ਰਹੇ ਸਿਖਲਾਈ, ਤਕਨੀਕੀ ਟ੍ਰਾਂਸਫਰ, ਮੁੱਲ-ਵਾਧਾ ਅਤੇ ਆਮਦਨ-ਵਿਭਿੰਨਤਾ ਸਬੰਧੀ ਕੰਮਾਂ ਦੀ ਜਾਣਕਾਰੀ ਲਈ। ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਖੇਤਰ ਦੇ ਕਿਸਾਨਾਂ ਨੂੰ ਆਧੁਨਿਕ ਖੇਤੀ ਅਤੇ ਪ੍ਰੋਸੈਸਿੰਗ ਤਕਨੀਕਾਂ ਨਾਲ ਜੋੜਨ ਦੇ ਯਤਨਾਂ ਤੋਂ ਜਾਣੂ ਕਰਵਾਇਆ।ਇਸ ਮੌਕੇ ਅਨੁਸੂਚਿਤ ਜਾਤੀ ਉਪ-ਯੋਜਨਾ ਤਹਿਤ ਕੇਵੀਕੇ ਫਾਜ਼ਿਲਕਾ ਅਤੇ ਆਈਸੀਏਆਰ-ਸਿਫੈੱਟ ਖੇਤਰੀ ਸਟੇਸ਼ਨ, ਅਬੋਹਰ ਵੱਲੋਂ ਆਯੋਜਿਤ ਇੱਕ ਮਹੀਨੇ ਦੇ ‘ਫੈਬਰਿਕ ਡਿਜ਼ਾਈਨਿੰਗ ਸਿਖਲਾਈ’ ਦਾ ਸਮਾਪਤੀ ਸਮਾਰੋਹ ਵੀ ਕਰਵਾਇਆ ਗਿਆ। ਇਸ ਸਿਖਲਾਈ ਵਿੱਚ 20 ਅਨੁਸੂਚਿਤ ਜਾਤੀ ਲਾਭਪਾਤਰੀਆਂ ਨੂੰ ਸਿਲਾਈ ਅਤੇ ਕਢਾਈ ਰਾਹੀਂ ਫੈਬਰਿਕ ਡਿਜ਼ਾਈਨਿੰਗ ਦੀ ਪ੍ਰੈਕਟੀਕਲ ਟ੍ਰੇਨਿੰਗ ਦਿੱਤੀ ਗਈ।ਸਿਖਲਾਈ ਦੌਰਾਨ ਭਾਗੀਦਾਰਾਂ ਨੂੰ ਕੱਪੜਿਆਂ ਦੀ ਕਟਿੰਗ, ਸਿਲਾਈ, ਕਢਾਈ, ਫੈਬਰਿਕ ਸਜਾਵਟ, ਬੈਗ ਬਣਾਉਣ ਅਤੇ ਨਵੇਂ ਉਤਪਾਦਾਂ ਦੀ ਡਿਜ਼ਾਈਨਿੰਗ ਦੀ ਟ੍ਰੇਨਿੰਗ ਦਿੱਤੀ ਗਈ। ਸਿਖਲਾਈ ਦਾ ਉਦੇਸ਼ ਔਰਤਾਂ ਅਤੇ ਲਾਭਪਾਤਰੀਆਂ ਵਿੱਚ ਹੁਨਰ ਵਿਕਾਸ ਦੇ ਨਾਲ-ਨਾਲ ਸਵੈ-ਰੁਜ਼ਗਾਰ ਅਤੇ ਆਮਦਨੀ ਦੇ ਮੌਕੇ ਪੈਦਾ ਕਰਨਾ ਸੀ।ਸਮਾਪਤੀ ਮੌਕੇ ਸ੍ਰੀ ਸੰਦੀਪ ਜਾਖੜ ਜੀ ਨੇ ਸਾਰੇ 20 ਭਾਗੀਦਾਰਾਂ ਨੂੰ ਸਿਖਲਾਈ ਸਰਟੀਫਿਕੇਟ ਅਤੇ ਸਿਲਾਈ ਮਸ਼ੀਨਾਂ ਵੰਡੀਆਂ, ਤਾਂ ਜੋ ਉਹ ਸਿਖਲਾਈ ਤੋਂ ਬਾਅਦ ਆਪਣਾ ਕੰਮ ਸ਼ੁਰੂ ਕਰ ਸਕਣ। ਉਨ੍ਹਾਂ ਨੇ ਹੁਨਰ ਵਿਕਾਸ ਅਤੇ ਪੇਂਡੂ ਔਰਤਾਂ ਨੂੰ ਆਤਮ-ਨਿਰਭਰ ਬਣਾਉਣ ਲਈ ਇਸ ਤਰ੍ਹਾਂ ਦੇ ਪ੍ਰੋਗਰਾਮਾਂ ਦੀ ਸ਼ਲਾਘਾ ਕੀਤੀ।ਇਸ ਦੌਰਾਨ ਕੇਵੀਕੇ ਅਤੇ ਆਈਸੀਏਆਰ-ਸਿਫੈੱਟ ਦੇ ਵਿਗਿਆਨੀਆਂ ਨੇ ਵਿਧਾਇਕ ਜੀ ਨੂੰ ਸੰਸਥਾਵਾਂ ਦੀਆਂ ਕਿਸਾਨ-ਕੇਂਦ੍ਰਿਤ ਗਤੀਵਿਧੀਆਂ, ਫੂਡ ਪ੍ਰੋਸੈਸਿੰਗ, ਮੁੱਲ ਵਾਧਾ, ਹੁਨਰ ਵਿਕਾਸ ਅਤੇ ਫਾਜ਼ਿਲਕਾ ਜ਼ਿਲ੍ਹੇ ਵਿੱਚ ਖੇਤੀ ਆਧਾਰਿਤ ਆਮਦਨ ਵਧਾਉਣ ਲਈ ਕੀਤੇ ਜਾ ਰਹੇ ਉਪਰਾਲਿਆਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ।